Kan hnulei December thla aa thok kaa hrawng ahkhan khua ka rak ruah mi cu, Korea um Laimi hna nih tukum chung i kan tonmi pawl ka hei ruat, Cu lak ah ngaihchiatnak kan tonmi hna kha ka hun ral thluahmah hna. Kumdang ah hi bantuk taktak hin kan si bal ttung lo ka ti. Ngaihchiatnak kong ka ruah lio ah ka lung i a chuak ngaimi cu, chuahni nak in thihni a sung deuh ti a si. Ziah Baibal nih hin mah tluk a fakmi thih ni hi a sung deuh tiah a ti hnga? Hi ca a ttial tupa hi a chung le an thi bal lo i maw a si hnga? ti hi ka ruat ngai. Cu lio hrawng ah capar pakhat ka relmi cu; minung hi kan tthatnak an rel caan cu caan khat te lawng a um i cucu kan thih caan hi a si tiah a ti. Hihi minung nih kan hmuh khawhmi thil cung ah chimmi/ttialmi a si. Minung nunnak hi cu a a thi ding a si zung zal. Cucu Vawlei in sermi kan si caah a si. Minung nih kan duh ning paoh hin thil hi hei chuak kho in hei cang kho ciammam seh law, a kan sertu Pathian kan philh lai, a kan hring tu kan nu le kan pa zei ah kan rel hna lai lo, kan u nau, kan hawi kom kan pawngkam i a ummi thil vialte hi zei ah kan rel hna lo pin ah zei ah an kan rel ve ti lai lo. Cu tikah Vawlei i a muisam hi a rawk ngaingai hnga ka ti. Cu bantuk in kan dawtmi hna zong kanmah nih cun thi lo in nung hna seh ti kan duh ko hna lai, Si hmanh seh law kan duh ning in thil hi a cang kho lo. Hihi Pathian khuakhan a si kan ti lai cu. Cu Pathian khuakhan a si kan ti khawh ko bu ah kan ton mi thil nih hin ttihnak, phannak, thla launak, fahnak, ect... a kan pek tthiamtthiam. Hi zong hi minung kan sinak a sullam cu a si ve ko rua.

Ka Nu hi Kum 7 hrawng a zaw cangmi a si. Kum 7 chung ahhin caan tampi cu zei tik dah a kan thih taak lai tiah thin domh bu in kan hngah caan a tam pi. Cu lak ah Korea ka phak kaa hoi hna ahkhan cun A rak dam tuk tiah thawng an ka thanh bal. I ka nu hi mah tiang sau le fak in a rak zaw cangmi a si tikah nikhat khat cu a kan thih taak hrimhrim lai ti hi ka rak ruah cia zungzal. Ka nu hi tuan ah maw hnu ah maw a kan thih taak ko lai caah tiah, zei tin dah hi thihnak nih mi a pekmi fahnak hi ka tei khawh lai tiah caan tampi laak in thla ka rak cam cia cang. Keimah te in lungtthawn ka rak i pe cia cang. Nifa ka tonmi thil a hlei in ngaihchiatnak thawng ka theih tik paoh ahhin ka nu kong ka ruat colh tawn. Hitluk hin keimah tein ka rak i tim ngai ka ti ko nain, Nai ah ka nu nih a ka kal taak taktak tik ah, lak hruak ngai in ka nu nih a ka thih taak ti i ka pawng i a ummi vun chim ding hi ka ngeihmi thazaang nih a phaan lo. Chim ding ah tha ka laa ka ti len ko lio ah ka nunnak nih vun chim taktak khi a celh lo. Hi tluk in ka rak i ruah cia a si komi zei caah dah tiah lungcan kaa pe tiah ka ti lio ah ka mit hna khuahmuh lo in an um. Ka ngakchiat lio tein ka rak i ruah chihmi bia pakhat, "Midang caah for others" ti a si nain atu tiang zei cahdah midang caah ka tthathnemnak zei tal a um khawh hnga lo, midang tu nih keimah caah zei zong vialte an tuah hi a si ka ti. Umm ka duh ning in le ka ruah ning in pei a rak si khawh lo hi. Ka ruahmi he a lettalam lawng te in an si dih hi ka ti. Ka ca a sau tuk sual lai caah ka ngol pah lai.

Ka nu nih a ka thih taak nak thawng nan theih cang kaa in, phone in a ka hnemtu nan dihlak cung ah siseh, Email in thazaang a ka pe tu le a ka tuarpi tu, nan umnak cio in thla a ka cam pitu, Phone chung in Baibal bia le thlacamnak in a ka hnemtu le ka rianttuan tti mi ka hawi le hna nih nan ka hnemhnak le nan ka ngaihchiatpi nak, thazaang nan ka peknak le nan ka chonh biaknak vialte cung ah lawmhnak tampi ka ngei. Nan sin ah kaa lawm ti leng in a chim awk dang ka ngei ti lo. Pathian tu nih thlua in chuah ko hna seh. Nan thlacam piaknak thawng in khua lei i ka chung le vial te zong dam tein an um cio rih hna. Hmailei zong ah thla rak kan cam pi peng rih uh! A hlei in Khua kan inn hi khual tlung mileng an i dinh tawnnak a si tik ah, Inn chung a zohkhenh tu Nuu bik a um ti lo hnu cun zei zong te a cham bau cang lai. Mualpho zong a fawi te cang lai. Hi zawn hrimhrim ahhin thla rak ka cam pi rih uh tiah kan nawl hna.