Sign In Sign-Up

Kei mah cu Pu Lian Dum (Pu Than Hmung le Pi Nu Hoi) le Pi Ttuan Iang i an fa ka si. Unau pasarih chuak kan si. Pa panga, nu pahnih kan si. Keimah cu Upalei in pa nga nak ka si. Ka nau le ah pa pahnih an um rih tinak a si cu. Ka u upa bik cu Nu Dawt Ci (Township immigration, Myohnyin, Kachin), A changtu Pa Lian Hei (KIA, Kachin), A changtu pahnih nak Nu Biak Pen (Mrs Lai Khuai <Tleicia>, Fanu Pahnih Siang Ttial Sung le Sung Hlei ttial), Achangtu pathumnak Pa Peng Lian (Nu Sun Ria, Fapa pakhat, fanu pathum), achangtu linak Keimah (Chan Bik Lian) Ka tlang- val rih. A changtu panganak Pa Ral Tthio Uk (Nu Mah Doi, Fapa pahnih, fanu pakhat), A chantu/ A hniangbik Dawt Lian Bik B.Th. Final (Yangon). Mah hi kan family kong a tawinak a si.

A ka hringtu ka Pa, Amah hi Unau Pa Pahnih le Nu pathum a ngeih hna, Amah hi a hniangbik a si. Kum 12 a rak si lio ah a pa (Ka Pu) nih a rak thih tak. Cuti cun ngaktah in a khua a rak sami a si. Kum 19 a si ah Ka nu he an rak i um. Nupi a ngeih sin in, Kan khuami cheu khat Ruan i an rak kal dih riangah, mi an rak um lo i Khrihfa upa (lutlai) ah an rak hman. Kum hleiriat hnu a ttuan hnu ah Khuabawi kum 9 a ttuan. Khuabawi a ttuan hnu in Khrihfa upa (bawmtu) ah kum 8 chung a ttuan tthan. Cu dih cun Khrihfa upa (lutlai) a tu tiang a ttuan tthan. Khrihfa upa a ttuancaan hi kum 35 chung a si. Amah hi 63 a si cang. Vun fak ta ning law, keimah hi afa le lakah upa leiin pa nga nak ka si, Mi nih ka nau ah an rel tawn (keimah tar ka lawh caah cun a si lo hehehe). Amah hi Rit-hai nak zei hmanh a tawng lomi a si. A ngakchiat lio ahhin, kan khua ah Sianginn a rak um lo caah Khuadang ah taang hnih tiang ca a rak cawng, A pa (Kapu) a thih hnu cun a peh kho ti lo. Ca taang zei hmanh a ngei lo nain, Laica, kawl ca a duh ning in aa rel, leh khawh. Amah nih 1995 kum ah kan khua Mangnu tuahbia zong a kan ttial piak (cauk in chuahmi) (cucaah CACC nih lawmhnak roca zong an rak pek ve). Lothlo fa a si pin ah, lothlo mi a si ko nain afa le hi ca cawn tha a kan pe tu a si pin ah, a ngeih chiah nih a phak leng tiang in, misin ah do a cawi i ca a kan cawnter tu a si. Afa le nih a neh kan zul kho te hnga maw? Aww tuchan fa le hi!!!

A ka hringtu ka nu, Amah hi, nagktah te a rak si ve. A ngakchiat lio kum hnih a si ah, raichia (Ngal eu) a rak tlung i a pa nih a rak thih tak. A nu (Kapi) nih a rak hmeih pi. (Ka pi cu va dang a ngei tthan i fa nu pakhat le Fapa pahnih a ngeih tthan hna, Ka pi hi kan khua lak i Khrihfa a rak cang hmasa bik nu a rak si). Ka nu cu ngakttah a rak si bang in, ca zong a rak cawng kho lo. Si hmanhseh law amah duh mi cu a ttial thiam, ramdang ka um lio ah ca zong amah kut te in a ttial i voi thum a ka kuat cang. Baibal ca rel hi a dam lio ahcun a rak zuam ngaimi a si. Asi nain atu cu a rel kho tuk ti lo, A ruang, 1996 dih lai khan a zaw (a ngor) lengmang i 2002 tiang, Pathian nih damnak thlua a chuah tthan i atu cu a dam cang kan ti ko nain, a damnak a tling kho deuh rih lo caah Baibal ca hna a rel khawh ti lonak a si. Fanu fapa 7 a kan ngeih i, cu zong cu zei hmanh duhdanh ngei lo tein a si khawh tawk a kan dawtu a si. Atu a dam tthan hi ram dang ka um hnu ah a si i, a hmurka theih ka duh ngai nain, khua (Mangnu) i a um tik ah, amah tein Halkha i tlun awk ah a tha nih a phak deuh lo caah atu tiang ka thei kho rih lo. A dam tthan hnu ah ka hawi le (hornbill) nih an va tlawng tawn i cu ahcun hmanthlak an thlak i mah cu an ka kuat i Feb. 27.2004 ni ah ka sin a rak phan hikaahhin a um, zoh ka cim hrimhrim lo. Ka rak ruahmi cu, kanu hi a hmurka siseh, a hmui hmai siseh, ka thei in ka hmu kho ti lai lo, (a rak zawt lio ahhin, zei tik dah a kan thih tak lai ti i ruahchannak dong ngai i a rak zawmi a si caah) tiah ka rak ruah. Sihmanh seh Zumtu hna thlacamnak cu Pathian nih a lak ah a can ter lo i atu ahcun a dam tuk cang timi thawng ka theih tikah kaa lawmh a zual khunnak le hi kong thengte zong ka ttialnak hi a si.

A ka dawtu ka nu cu hi vawlei har satnak hi a tuar khawh ti lo caah 2004 Dec. 10 zanlei Suimilam 1:00pm ah a nunnak a dih i 2004 Dec. 11 zanlei 1:30pm ah a ruat cu an vui. Rian dangdan tampi lak ah a ka ngaihchiat pitu hna sin ah le a ka hnemtu hna sinah hica hi ka kuat hna.
>>>> Ka u le ka nau kong